mar-25 Txikori belar, ziazerba eta asunen arrauzkia

Barazki RZ

TXIKORI BELAR, ZIAZERBA ETA ASUNEN ARRAUZKIA

  • Hartu eskutada bat belar bakoitzetik, egosi banan-banan hirurak (bi baizik ez izaki, ondo; bakarra baduzu, bale; etxean arrautzarik ez badago, eskaini sakrifizio hau merezi duen zerbait edo norbaiti).

  • Egositakoan, xehatu labanarekin baratxuria edota tipula alde batetik eta, esaten den moduan, besteak bestetik.

  • Ipini zartaginean malko bat olio eta gorritu hor tipula edota baratxuria.

  • Ondoren, erantsi barazkiak.

  • Bitartean irabiatu arrautzak: lau bazarete, bost; beti bat gehiago, paderarentzat. Zartaginekoa emeki doa, su eztian. Dena homogenotu denean, bota arrautza irabiatua paderara eta, egurrezko koilararekin eragin denari. Atera sutatik mamitu aurretik, zukutsua jan behar baita.

Trasteria

Brotxa edo pintzela

Espezializatutako lanetan luzitzen du brotxak bere burua: moldeak edo erretzen ari diren aleak olioztatu, zeinahi barazki edo fruta ez oxidatzeko limoiz igurtzi, labera doan hostopila gorringoz janzteko…

 

Zerrikerietan

Urdaiazpikoa

sin: xingarra, pernila, urdantzakia; es: jamón; fr: jambon; en: ham. Urdearen hanka da, gordin, egosi, lehortu edo keztatutakoa (txerri produkturik garestiena); besoari prozedura berberak aplikatu zaizkion arren, ez da urdaiazpikotzat jotzen. Txerria Asiatik etorri zen arren, Europa osoan gazitu da txerrikia, klimak horrela aginduta.

Prozedura hauek aplikatuko zaizkio urdearen hankari, urdaiazpiko bihurtzeko:

1) odolustea: hankak ebakirik, ahalik eta odol gehien erauzi behar zaie, eskuz estutuz, tekorik ez hartzeko;

2) lehortzea: hezetasuna galdu behar dutenez, karga ezarriko zaie gainean;

3) gazitzea: gatza emango zaie eta elkarren gainean pilatuko, bi asteko epean horrela irauteko, goialde eta behealdekoak aldatuz, etab.;

4) gazitze ondoko fasea: orain arte gatza kanpo aldean bakarrik hartu duenez, kontzentrazioa orekatu beharra dago hiru hilabetez;

5) ikuztea: ur epeletan garbitu eta eskuilez igurtziko da pieza, hondakinez garbitzeko;

6) ontzea: lehortegi natural edo artifizialetan emango du tarte bat (hilabete eta erditik 18 hilabetera arte), usain eta zaporeak garatzeko.

Goi Nafarroan eta Ipar Euskal Herrian ondu egiten da (piperrauts gorri, baratxuri, olio eta usain belarrekin), hobe iraun dezan.

25. martxoa 2014 by edortagirre
Categories: Sailkatu gabea | Leave a comment

Leave a Reply

Required fields are marked *


Tresna-barrara saltatu