Abu-17 Parrilan erretako fruta-brotxeta

Donostiako Aste Nagusia bukatu berria, bere aje eta guzti.

Ez da harritzekoa, beraz, santuak, koloriñak eta horrelakoak ez agertzea, langileak ez baitaude zereginetarako umorez.

Gu, berriz, jai denetatik iheska, hemen izango gara, gaur ere, oporretara nora joango diren oraindik erabaki ez dutenei Euskal Herritik kanpoko jan-edanen kontuak erakustera.

Aprobetxa ezazue, abuztuko kondarrak gainean ditugu-eta.

NORMANDIAKO GASTRONOMIA

Azalpen orokorra: bretoiaren auzoa izaki, normandoak ere jan-edatea gustukoa izan du, tradizioz, eta horretan lagundu dute eskualdea blaitzen duen itsasoko arrain eta itsaskien (beira, ostra, muskuiluen) eta lehorreko lur emankorren fruituek. Normaundie (hala da, bertako hizkuntzaz, Gipuzkoako Goierrin bezala ahoskatua) eta Jerseyko behien esnea eta esnekiak sona handikoak dira: gaztak (Camembert, munduan ezagunena), gaina, gurina… Honakoa beraiek sartu zuten hexagono osoko sukaldean, txerri gantzaren ordez (XVII. mendetik, gutxienez). Larre gazietako arkumeak, zaharren haragi gorriek, barrukiek, txarkuteriako produktuek asetzen dute bertako herritarren okela onen zaletasuna. Bereizgarri edo bitxitasun gisa, sagarra berduratzat darabilte jaki normando batzuetan. Beste bat: oturuntzetan eskuarki, trou normand izenekoa egiten da: tartetxo batean, tragoxka txiki bat calvados hartzen da, jaten segitu ahal izateko.

Koipe edo gantza: tradizioz, gurina; egun, oliorako joera nagusitu da.

Gaztak: hamaika aukera dago, behi eta ahuntza esnez eginikoetan, batik bat: Boursin, Brillat-Savarin, brique Lisieux-koa, Bondard, Pont-l’évêque, Trappe, Camembert, Carentan, carré freskoa, Cornellais, Coutances, démi-sel, fin de siècle, Manche-koa, Gournay, Angelot, Bondon, Graval, Pavé Plessis eta Auge-koa, Hayons, Livarot, Maromme, Bray-ko carré, Montcarré, Neufchâtel, Petit Suisse…

Hestekiak: txerrikiz osaturiko andouille eta andouillette hestebeteak, odolki zuri eta beltzak, tripakiak, saltxitxak, Valognes eta Cotentin-go urdaiazpikoak, untxiaren fianbrea, arkume hankatxo gaziak, rilletteak.

Postre eta gozokiak: hiru fruta nagusitu dira: sagarra, udarea eta gerezia; teurgoule (antzinako tordre gueule esakunetik omen dator: “ahutzak okertzea”) izeneko postrea bost orduz su ezti-eztian eginiko arrozesnea da, kanelaz lurrindua.

Edariak: sagardoa, sagardozko grog-a, udarardoa, Calvados, Benedictine, flip, noyau, pommeau (sagar muztioa eta calvadosen nahasketa), poiré (pommeau horren antzeko, madarizkoa) eta, hein txikiago batean, ardoa.

 

 

17. abuztua 2014 by edortagirre
Categories: Sailkatu gabea | Leave a comment

Leave a Reply

Required fields are marked *


Tresna-barrara saltatu