Urr15-Usoak

 

GURE EGUNA OSPATZEKO, SOUFFLE EDER BAT

Bere azalpen eta guzti. Ez ikaratu, ez lotsatu. Eutsi goiari!

Souffle ona egitea ez da izan sukaldari afizionatuaren eskurako arrakasta. Goazen pixkanaka.

a) Kazo txikian 80 gramo idiazabal gazta eta 30 gramo gurin urtuko ditugu, su eztian. Adi tenperaturari: gantz horiek erre gabe, batak bestearen lurrinak ez suntsitzeko. Ardi gaztak aproposak dira soufflea egiteko horretarako.

b) Sutan dagoela, gehitu 45 gramo irin. Irinaren almidoi-molekulak ura xurgatu, hanpatu eta, gantzekin bat egitean, ore homogeneoa osatuko du denak. Bexamelaren antzeko funtsa izango da, noski.

c) Irakiten jarri dugun litro laurden esnea, gatz, muskada eta piperbeltz pittin bat erantsiko diogu, palotearekin nahasteari utzi gabe. Gantzak eta esneak emultsioa osatu dute orain, gure laguntzari esker: horregatik ari gara eragiten egurrezko espatularekin, pikorrik sortu ez dadin.

d) Itzali sua baina segi eragiten kremari. Itxaron epeldu arte eta gehitu orain sei arrautza-gorringo. Ez gaineratu gorringoak masa bero-bero dagoela. Gorringoak gogortuko balira ezingo lukete bere eginkizuna bete. Zein eginkizun? Hirutik bi airez osaturik dagoen soufflearen moldatzaile eta armazoia izatea.

e) Eman sei zuringoei amiñi bat gatz (erne, gazta ee gazia baita) eta harrotu elur puntura, trinko sakar.  Kontua da zuringoak harrotzea, aire “ttanttak” zuringo-molekula tarteetan sartzea. Bits edo apar hori egonkor samarra da fisikoki baina, jaitsi egingo balitz, berriro harrotu beharko genuke.

Zuringoak zenbat eta gehiago irabiatu orduan eta txikiagoak izango dira aire tarte edo burbuilak; aparra, egonkorrago, iraungarriagoa. Souffle goxoena izango da ur gutxien gorde duena, urak zaporerik ez duelako .

f) Eratsi harrotutako zuringoak hasieran eginiko gazta-kremari, poliki, pazientziaz: soufflea egiten ari gara, gutizia, apeta edo gurari bat, atseginez. Gehien eta hobekien harrotzen diren souffleak burbuila gehien (eta txikienak) dauzkatenak badira, orain, bi prestaketak nahastean arretaz jardun behar dugu, burbuila gehiegi ez suntsitzeko. Jardun azkar baina suabe, poliki. Den-dena erabat nahasten ez bada, lasai: aho-ukituak eskertuko du alde txiki hori ere (hautematen badu).

g) Igurtzi olio edo gurinez molde zabal bat eta zikindu irinez. Bete 2/3 edo 3/4 gehienez . Molde zabala baliatuko dugu lurruntzea errazteko. Gurinez eta irinez estali dugu moldea, orea ez itsasteko, harrotzean libre ibil dadin. Bestela, magdalenari bezala, konkorra erdialdean geratuko litzaioke.

h) Sartu 180º C-tara berotutako labean eta eduki bertan 20-30 minutu inguru. Ea, ea: zenbat minutu, 20 ala 30? Zaude, lasai: txokolatezko souffle bihotz-erdiragarria edo barruan izozkia daukan alderantzizko sumendi hori erdietsi gura baduzu, eman 200º eta eduki 20 minutu. Barnetik homogeneo eginikoa nahiago? Jaitsi tenperatura eta eduki oraingoz tartetxo bat .

Goialdea lau-laua erakutsi behar badugu, hoberena hasieran grill azpian segundo batzuetan edukitzea, gorritu eta gogortu dadin. Gero uniforme harrotuko da soufflea, argazkiaren mesedetan.

Txikia da gaur emaniko errezeta aplikatuz aterako dugun soufflea. Baina gauzak oso-oso ongi aterako zaizkigula seguru ez badakigu, hobe behetik hastea. Hemen adierazitako kopuruak baliatuz gero, gauza jangarria aterako dugu labetik (aurrekoetan bezala). Seigarrena adiskide guztientzat egingo duzu: foiez, onddoez, melokotoi marmeladaz, itsaski kremaz… zernahiz hornitua.

Zorionak, artista!

15. urria 2014 by edortagirre
Categories: Sailkatu gabea | Leave a comment

Leave a Reply

Required fields are marked *


Tresna-barrara saltatu