RZ: bakailao “a bras” (15.03.30)

Bakailao RZ ugari

Izenburu horrekin bakailaoa prestatzeko formula batzuk uztarpetu nahi ditugu hemen. Gaur hasi eta denboraldi baterako izango dugu soka.

“A bras” bakailaoa

bacalhau a bras bilaketarekin bat datozen irudiak

Portugal ia osoan Aste Santuan kontsumitzen da bakailaoa prestaera erraz eta herritar horretan. Izenaren jatorrian sortzailearen abizena (Braz jauna) bazegoen ere, grafia z-tik s-ra aldatu zen. Ortografiarekin arazorik ez izateko, dena den, “urrezko bakailaoa” ere dei dakioke (bacalhau dourado), eskualde batzuetan bezala.

Ikusiko dugunez, bezperatik beratutako arrainki gazia eta patata eta arrautzekin osatuko da jaki goxo hori.

OSAGAIAK(4 lagunentzat) 

400 g. bakailao, gezatu eta papurtuta

600 g patata

3 tipula, txirrindola finetan ebakita

6 arrautza

1 baratxuri xehatuta

3 koilarakada perrexil xehatu

16 oliba beltz

4 dl oliba olio birjina

gatza

piperbeltz eho berria

Bakailaoa 36 orduz gutxienez beratu beharko da, ura hiru aldiz aldatuz. Edukitzeko toki egokiena hozkailua da. Gezatze prozesua faktore askoren arabera aldatzen denez —pusketen lodiera, uraren osaketa, tenperatura, etab—, erreferentzia gisa soilik ematen dugu denbora. Hortaz, arrain pusketak uretatik atera eta prestatzen hasi aurretik, gatz puntua dastatu beharra dago beti.Bakailaoari, xukatutakoan, hezur eta azalak erauziko dizkiogu eta, ondoren, ziriak osatuz papurtuko dugu. Horrela, 400 gramo bakailao jangarri izango dugu.Kazola batean 1 dl olio, tipula xerrak, baratxuria eta gatza jarriko ditugu, su ezti-eztian. Estali eta utzi erregosten 30 minutuz, gutxienez. Barazkiak beratu egingo dira baina gorritu ez, inola ere.

Zuritu patatak eta ebaki xerra mehetan (3 mm lodi); hauek ere ziritan ebakiko ditugu, luzeran (5 cm, hor nonbait), “lasto patatak” eratzeko. Garbitu ur ugaritan, inguruan duten almidoia erabat desagertu arte. Xukatu eta lehortu, zapi garbi batez.

Ipini padera batean gainerako olioa (3 dl) eta berotu su ertainean, ke pittin bat hasi arte. Patatak orduantxe erantsiko ditugu, minutu batzuetan olioak irakin dezan eta patatak erre daitezen; azkenean, altxa sua, patatak gorritzeko. Kontuan izan: ez dute lehor edo frijituegi agertu behar: barrualdea zukutsu eta guria eduki behar dute. Xukatu eta gorde.

Arrautzak gazpipertu ondoren, irabiatu egingo ditugu.

Eskuratu berriro tipula eta baratxuri erregosia dauzkan kazola eta erantsi bertara papurturiko bakailaoa; nahasi dena, arretaz. Horri, prestaturiko patatak gehituko ditugu; nahasi eta astinduko hauek ere, osotasunean integra daitezen. Sua ezti-eztian, erantsi arrautzak eta nahasi, gorputz osoa krema bihurtzen hasi arte.

Atera berehala jakia sutatik, zabaldu perrexil xehatua gainetik eta oliba beltzak, azkenean. Zuzendu gatz puntua eta zerbitzatu lehenbailehen.

 

30. martxoa 2015 by edortagirre
Categories: Sailkatu gabea | Leave a comment

Leave a Reply

Required fields are marked *


Tresna-barrara saltatu