Aholkuak

  1. Denborak. Errezetako denbora ez da dogma: baserriko oilaskoa ez da granjakoa, adibidez. Dastatu, egiaztatu, ukitu, begiratu behin eta berriro. Zeu zara arduradun, zeu errudun. Gozogintzako denborak, kopuruak eta datuak, berriz, dogma dira beti. Hau mundu eroa!

  1. Patata ilunpetan gordetzea komeni da: argitan, solanina izeneko gaiak berdetu, mikaztu eta digestio astuneko bihurtzen du patata.

  1. Arraina xerratan erosi aurretik, begira hezurraren ondokoa gorria duen: horrela bada, zaharra da; aukeratu beste arrain bat.

  1. Tipula ebakitzean malkoak ez isurtzeko, ebaki bizi-bizi labana handiarekin, leihoa zabalik edo estraktorea martxan dabilela. Bestela, maneiatu aurretik sartu 10 minutuz izozkailuan edo ordu erdian hozkailuan. Azala itsats-itsats eginik duten tipulin asko baldin badituzu, galdarraztatu aurretiaz ur irakinetan minutu batez.

  1. Xanpaina etxeferorik gabe (eta alferrikako galerarik izan gabe) irekitzeko, inklinatu botila eta, horrela dagoela, atera kortxoa, goxo-goxo.

  1. Haragi errea bere zukuaz aberasteko, labeko plakan geratu diren hondarrei erantsi barazki edota belarrak, erre ardo edo pattar batekin eta murriztu erdira edo. Iragazi eta saltsa pronto duzu, horretarako edo beste baterako.

  1. Elikagaien etiketan behin ere agertzen ez den arren, landare-olioa koko, palmondo edo palmistekoa baldin bada, animali gantzak bezain kaltegarria da (kolesterolaz ari gara). Horregatik ez ohi da agertzen alderdi hori.

  1. Azken marrubiak badoaz-eta, oraintxe duzu aukera kilo batzuk hartu, garbitu, egosi eta, birrinduta, jelatzeko. Toki gutxi beteko dizute izozkailuan. Udarako postreetako saltsak edo udazkeneko ehizaren osagarriak prestatu ahal izango dituzu honela. Botila batean erdiraino edo, sartu marrubiak eta bete anis gozo-lehorrez. Gorde ilunpean negura arte.

  1. Baratxuri-, arrain- edo bestelako zopei eranstean salda guztia hurrupatzen du ogiak. Ez larritu, ez gehitu urik. Utzi minutu batzuk eta etorriko da tamainara.

  1. Frijitzeko tenperatura egokia da olioa 170-190º C-tan dagoenean, hau da, sartu egurrezko espatula oliotan eta, inguruan burbuilak, apar edo bitsa sortzen bada, hortxe dugu, apropos.

  1. Gure labeak egurasterik ez badu, sartzen dugun jakia, erdi egosia dagoela, atera eta beste aldera jarriko dugu, beroak alderdi guztiak uki ditzan.

  1. Oliba-olioa urte berean hartu behar da; bitartean, gorde toki ilun, fresko, lehorrean, oxidatu eta mindu ez dadin.

  1. Baratxuri mordoa garbitu edo zuritu baduzu (piperrak kontserbatzeko, adibidez), banandu burutik eta sartu atalak ur beroan. Eduki ordu erdia eta azala berez aterako zaio, kasik.

  1. Ile edo lumadun ehizakiak erositakoan (ez dakigu noiz harrapatu diren), lehenbailehen egitea komeni da.

  1. Erretakoan, utzi pieza (birigarro zein ahate) labean, aluminiotan bildurik edo ontzi baten barnean pausatzen, odolak eta zukuak beren tokietara itzul daitezen. Ez izan presarik, bost minutuko kontua da-eta: hobe epelago baina “bukatuago” jatea.

  1. Patatak eta tipulak elkarren ondoan gordetzen badituzu, biak haziko zaizkizu. Ez gorde baratxuria argitan edo toki hezean, ustel ez dadin.

  1. Kakahuete- edo oliba-olio bera 10-12 frijialditan erabili daiteke; arto- eta ekilore-olioa, 3-6 gehienez ere.

  1. Zopako ogirik ez baduzu, kiskali labean ogi arrunta. Ez frijitu, koipetsuegi gerta liteke eta: ogiak gantz asko hurrupatzen du.

  1. Porruen alderdi berdea ez bota zakarrontzira: bitamina gehien dituen alderdia izateaz gain, potajeei erantsi, saltsak indartu, salda egin eta jakiren bati gehitzeko… balio du. Platerean ikusi nahi ez baduzu, egosi garbantzu-sarean eta baztertu, bere lana eginikoan.

  1. Flana egiteko esnea areago gozatzeko, irakin 2-3 pikondo-hostorekin.

  1. Ogi birrinduak urdin- edo zahar-tejorik ez hartzeko, sartu ontzian ereinotz edo erramu hostoren bat.

  1. Letxua erositakoan, garbitu orriz orri eta gorde ontzi edo poltsa batean, berehala jango ez duzuna alferrik ez galtzeko. Zimeldu baldin bada, sartu ur freskoan, berriro “suspertu” arte.

  1. Arraina, gutxi egosi behar da, oro har. Zenbat eta arrain urdinago, orduan eta gordinago. Atuna eta hegaluzea haritza edo pagoa bezain zukutsuak geratzen baitira, luze egosi ondoren.

  1. Aritu edo artatsua ez bazara, arraina zerorrek garbitu ordez, eska iezaiozu saltzaileari egin dezan, zertako nahi duzun adierazita. Begira nola ari den, ikasi.

  1. Potajeak: zortzi bat orduz beratu ondoren, jarri egosten babarrun eta dilistak ur hotzetan; garbantzuak, hamabi ordu pasatakoan, ur irakinetan.

  1. J.M. Arzakek ez du atsegin arrain erreari olio-frijiki irakina eransterik: berotuta bakarrik, beti bezain goxo izaki, liserigarriago eta, nutrizioaren ikuspegitik, zuzenago da.

  1. Arrautza duen jakia egin ondoren, berehala jan behar da, arriskurik ez izateko.

  1. Txipiroi txikia betetzeko, galtzerdiari bezala ematen zaio buelta. Horrela betez gero ez duzu zotzen premiarik izango zakua itxita mantentzeko.

  1. Pikilloa betetakoan, ez bildu irin-arrautzetan: horrela motelago geratzen da.

  1. Arroza aske geratzeko, egosi aurretik frijitu ezazu ongi (bera bakarrik edo barazkiekin), luzaro, egurrezko espatularekin eraginez. Ondoren erantsi ur irakina eta jaitsi sua luze gabe: egur-sutan ari bailitzan.

  1. Haragiak ez du beratu behar bere zukuan: erretiluek sarexka dute, okela eta likidoa bereiz mantentzeko. Horrelakorik ezean, plater batean jarri beste txikiago bat, buruz behera, eta honetan haragia. Atera hozkailutik prestatu baino ordubete lehenago. Ez garbitu uretan: zukuak eta zaporea galtzen dituenez, gogor eta gezagoa izango dugu. Hobe zapiarekin igurtzita.

  1. Gaztainak aiseago zuritzeko, sartu izozkailuan, galdarraztatu ur irakinetan 2 minutuz eta hoztu iturripean, azkenik. Edo, bestela, salmiztu (ebaki) bi azalak (alea ez lehertzeko) labana zorrotzarekin eta frijitu olio bero-berotan pare bat minutuz, estalkia gertu daukazula. Xukatu paperean eta zuritu.

  1. Untxia ebakitzean, harakinak aizkora erabili eta maiz hezur-printzak uzten ditu. Horrelakorik ez aurkitzeko, ebaki zerorrek untxia labanarekin, aizkora erabiltzeke, junturetatik.

  1. Tenperatura-aldaketa bortitzak hautsi egiten du arrautza-oskola. Ustekabekorik ez izateko, ipini arrautzak eltzean, estali urez eta berotu emeki-emeki. Errazkiago zuritu nahi baduzu, erantsi urari gatza eta ozpina.

  1. Ez gorde itsaskiak uretan, inongo mesederik egiten ez baitie horrek: ipini bere ontzian, estalki eta guzti, ahal izanez gero.

  1. Hur, amanda eta gaztainaren oskolaren hurrengo azala zuritzeko, sartu ur irakinetan eta ondoren ur hotzetan. Bestela, erre plantxa gainean edo paderan, eta igurtzi zapi batez, azala harrotu arte.

  1. Parrillan zerbait erre ondoren eta amorrazioz higitzen ari diren tripa-orri gupidagabe horiek baretzeko, sartu errauspetan (errauts tartean) kalabazinak, arrautzak, patatak edota tipula txikiak. Kalkulatu ongi denbora, lehen aldian.

  1. Arrautzarik gabeko patatatortilla: konfit erako izterra jan ondoren, baliatu gantz hori patata egosteko, xuabe-xuabe. Gorritu ederki eta, egindakoan, xukatu erabat.

  1. Alkatxofa lorea denez, uretan gorde behar duzu bizpahiru egunez, egunero zainari pusketa bat ebakiz. Astunenak dira egokiagoak. Egosteko, ipini uretan limoi erdi baten zukua (C bitaminak oxidazioa eta mikroorganismo batzuek agertzea galarazten duelako) edo sartu banan-banan ur irakinetan, garraztasuna gustukoa ez baduzu.

  1. Babaren digestioa errazago gertatu eta ahogozo finagoa izateko, zuritu leka eta alearen azala, biak.

  1. Eztia txarroan kristalizatua duzunean hobe duzu azenarioa (birrinduta, jateko asmoa baduzu) sartu, zurezko koilararekin eragin edo, besterik gabe, ezti freskoa kontsumitzea: beroak propietate mesedegarri batzuk suntsitzen dizkio eztiari.

  1. Arrozari jatunak itxaron behar dio eserita baina hori beti posible ez denez, berandu iritsiko den horrek ere puntuan dasta dezan, arroza egosten hastean erantsi limoi ttantta bat. “Ttantta bat ez da kupela bat” esango luke Patxi Abadek.

  1. Jakia kolore gorristaz edertu nahi baduzu, moldatu zerorrek edergailua: koilarakada bat azukre eta ur tantoren bat padera zaharrean ipini eta, karamelua bilakatuta, erantsi salda edo saltsari. Edo erre tipula-xerrak paderan eta, ondoren, erantsi.

  1. Paderari itsatsita geratu zaion karamelua kentzeko, bete urez padera eta jarri berriro sutan.

  1. Txipiroia parrillan edo plantxan gutxi erre behar da; saltsatan, berriz, luzexka edukitzea komeni da. Begi haundi txipiroia samurtzeko, sartu izozkailuan ordu batzuetan.

  1. Baratxuria edonori ez zaio gustatzen. “Tekoaz” higuindu gabe baratxuri-lurrinaz apaintzeko, igurtzi atal batez entsalada-ontzia edo labeko erretilua, edo ogi xigortua… Bere usain edo kiratsa ahotik zein eskuetatik kentzeko, murtxikatu edo igurtzi perrexila.

  1. Lehortu txanpinoi batzuk labean. Deshidratatu direnean, birrindu edo xehatu malats elektrikoarekin eta gorde hauts hori txarro batean, ilunpean. Gehitu salda, saltsa, ehiza edo zuk nahi duzunari, beste bouquet bat emateko.

  1. Perrexila xehatu bai, baina ez da pure bat egin behar: labanak zorrotz egon behar du, hostoa hausteke zehazki ebakitzeko. Zainak ez dira aprobetxatzen, honetan. Xeheegi, perrexilak ez du usainik, sega-belarra ematen du. Zimeldu egin bazaizu, busti uretan, lehortu paperaz eta, zut dagoela, ebaki.

  1. Patata frijitu kraskatsuak lortzeko, ez egin padera itsasgaitzean, ez eman gatza azken unera arte, ez erabili koipea epelegi.

  1. Indioilarra, guri. Hegazti lehor honi konponbidea emango diogu: berotu labea 180° C-tan. Igurtzi azal osoa olioz, eman gatza eta piperra eta bildu aluminiozko paperean. Erre labean: ordubete kiloko. Kendu orduan aluminioa, busti gantz horrekin eta altxa labea 200° C-etara, ongi gorritu dadin.

  1. Indioilarra arras geza denez, hozkailuan pare bat egunez “ingresatzea” komeni zaigu. Bertan, tratamendua aplikatuko diogu: bular eta izterretan lau bat injekzio kognak sartuko dizkiogu, susper dadin. Tapatu ondo gaixoa, zapi batekin.

  1. Txokolatea samurtzeko, sartu mikrouhin labean, eduki 15 segundo, atera, eragin, sartu berriz… nahi dugun bezalaxe bigundu arte.

  1. Marrubiari ez zaizkio txortena eta hostoak kendu behar garbitu aurretik: ura sartzen bazaie, belaxka eta gesal gertatzen dira.

  1. Antxoa txiki-txikiak, baratxuritan eta tortillan; koskorrak, hezurgabetuak, binaka frijitu edo arrautzeztatuak; handienak, erreak, gatzetan, papilotean, xerratan frijituak.

  1. Bitxia da aguakatea: ez erosi heldua, egun horretantxe jan behar ez baduzu. Aukeratu ale gogorrak: heldu baino 15 egun lehenago jasoko zituzten. Umotzea azkartu nahi baduzu, bildu periodikotan, denak elkarrekin.

  1. Zerbait frijitzen ari zara eta paderan ur tanta bat erori da. Hortxe su-festak! Jaialdia baretzeko, bota gatza toki horrexetan edo jarri estalkiren bat edo bata eta bestea. Kontuz eskuturra, lagun.

  1. Hartu apio-atal bat eta lehortu labean. Xehatu edo birrindu malatsa elektrikoarekin. Hor duzu apio-gatza, salda, saltsa, krema, pure, ehiza eta hainbat plater markatzeko ongarria.

  1. Kanela edo bainilari probetxu handiagoa ateratzeko, ebaki (zotza edo leka) luzeran. Erabili ondoren ez bota: lehortu paper batez, gorde azukretan, kristalezko txarroan (usain ederraz janzteko), oliba-olioko botilan (lurrintzeko) edo bildu aluminiotan, hurrengoan ostera baliatzeko.

  1. Piperraren azalak piperra gordetzeko balio du, ez guk jateko. Kendu nahi badiozu, murgildu piperra olio irakinetan, ipini su gainean edo sartu labe bizi-bizian. Kontuz: alea egosi gabe.

  1. Bexamelari urdaiazpiko, perretxiko, bakailao, arrautza egosi edo antzeko zerbait erantsita, plater bukatuagoa erdietsiko dugu.

  1. Ez bota arrain edo itsaskien azal eta buruak zakarrontzira, fumet on bat egin aurretik. Erregosi kazolan oliotan, tipulin bat, bi baratxuri, porru baten zati berdea eta azenario batekin, dena xehatua. Erantsi basokada erdi bat ardo txuri eta beste bat ur. Eman gatza eta erregosi ordu erdiz. Iragazi eta jelatu, nahi baduzu.

  1. Eman dezagun txokolatezko orriak egin behar dituzula. Urtu txokolate beltza eta aukeratu mendiko orri ez toxikoak: ereinotza, gorostia, ezpela, frutarbolak… Estali txokolatez, brotxarekin edo. Utzi hozkailuan ordubetez. Atera eta, biharamunean bertan, bereizi txokolatea eta hostoa, arreta handiz.

  1. Arroz karraskatsua erdiesteko, egosi 150 g. –adibidez— arroz, basmati motakoa. Eginik, hartu 50 g eta berotu padera itsasgaitzean, etengabe eraginez; lehortu denean, atera platerera eta ipini paderan bi koilarakada olio, berotu dezente eta frijitu bertan arroza. Gorritu eta, kraskatsu bilakatu denean, jarri paper xukagarrian. Nahastu gainerakoari, azkenean.

  1. Bakailaoaren saltsa arinegi geratu al zaigu? Arraina egosi ondoren, atera dezagun kazolatik. Bertan dagoen saltsa –asko berotu gabe– iragazkia eraginez lodituko dugu. Bestela, xehatu malats elektrikoarekin. Sartu berriro arraina eta mahaira.

  1. Tomatea zuritu nahi baduzu, sartu ur irakinetan 30 segundoz; atera bitsaderaz eta murgildu ur hotzetan: berez aterako da azal osoa. Horrela ez da errotan astuna gertatu ohi den tomate-azala agertuko marmitakoan, oreetan edo… entsaladan.

  1. Angula ez da buztinezko kazolan egin behar: horrela lehortu eta desegingo litzateke. Hobe duzu kazola hori berotu (irakin ura bertan, adibidez) eta angulak paderan egin, bizi-bizi.

  1. Patata egosia dagoela honela frogatuko duzu: utzi puska bat lurrera erortzen; saltaka badoa, ez dago prest; bertan motel, zlap, geratuz gero, bale.

  1. Limoi-tantaren bat behar baduzu, ez alferrik galdu limoi osoa: zulatu zotz batekin, sartu pare bat zentimetro, atera eta xukatu limoia. Iturria berriro ixteko, ipini zotza bere zuloan.

  1. Postre eta nahi dituzun jakiak limoi edo laranjaz lurrintzeko, hoberena limoi-hautsa: zurigailuarekin erauzi bost ale ekologikoren azal gorrixka edo horia (zuria, ez). Lehortu labean, 4 orduz, 125° C-tan. Xehatu errota elektrikoan eta gorde kristalezko txarroan. Edota igurtzi platera azalarekin.

  1. Lekale lehorrak urtebetean (udazkenera arte) kontsumitu behar dira, hortik aurrera hondatu egiten direlako. Lehor-zapore sakonegia arindu nahi baduzu, 12 orduz beratu ondoren, sartu ur hotzetan eta berotu irakin arte; eduki horrela bi minutuz. Atera eta xukatu, egosi ur irakinetan beste bi minutuz, erantsi ur hotza eta baztertu azaleratutako babarrunak. Pronto dituzu gainerakoak.

  1. Babarruna harrak jan ez dezan, jelatu egun batzuetan. Atera izozkailutik, zabaldu, lehortu ongi-ongi, eta sartu bere ontzian, ilunpetan.

  1. Arrautza-zuringoak elur-puntura errazago harrotzen dira aurretiaz epeldu baldin baditugu.

  1. Perretxiko freskorik ez badugu, liofilizatuak (potokoak) erabil ditzakegu, sutan jarri aurretik berriro hidratatu ondoren.

  1. Bakailaoaren gelatinak 70° C inguru eratzen dira. Hori baino beroago luzaro mantentzeak eragotziko du pil-pil saltsa loditzea, biziki huntsa dakizun bezala.

  1. Entsaladak azken unean ondu behar dira: lehenago eginik, zimeldu egiten da barazkien ukitua, itxura, kolorea… Hobe da entsalada epeletako osagaiak banan-banan egostea, usain eta zaporeak nahas ez daitezen.

  1. Egosaldiko denbora ura (bigarren aldiz) irakiten hasi denetik kontatzen da.

  1. Barazkiak zuritzeko ez erabili limoi larregi: hobe da ilunxeago jatea, limoiak zapore eta usaina erretzea baino.

  1. Ilarrak zaporetsuago gertatzen dira, uretan egosi ordez, beren lekaz eginiko saldan egosita. Egin aurretik, baztertu erdipurdikoak: uretan, azalean geratzen direnak, alegia.

  1. Itsaski freskoak ez du beltzunerik agertzen. Arakatu aleak eta ez erosi horrelakorik, ez eta amoniako usaina duenik. Jelatuak, prestatu aurretik, garbitu edo, hobe, eduki hamar minutuz ur gazitan. Kontserbakari eta gainerakoak buruan gelditzen direnez, hobe hori ez zupatzea.

  1. Ahatearen foie-grasa prestaketa beroetan erabiltzen da gehien, zapore eta usainez sendoagoa delako; antzararena jaki hotzetan sartzen da, finagoa delako.

  1. Atun edo hegaluzea ebakitzean, hobe da pusketak (xerrak) luzera egitea, “betiko” zeharkakoak (trontzak) baino: honek, arrainaren egitura desegiten duenez, jateko unean arrainki lehorragoa izango dugu.

  1. Keztatuak erostean, ez aukeratu koipetsuak, lehorregiak edo ertz ilunekoak. Trinko (gogorregi gabe), gardentxo, atsegin agertu behar dute horrelako arrainek.

  1. Saltsa berdea lodi ager dadin, ez gorritu baratxuria. Hobe duzu su gainean birritan ez berotzea: irakinez gero, saltsa galdu, osagarriak bereizi egiten dira eta berriro eragin beharko da.

  1. Kontua ez da osagaiak, egoskerak, kopuruak… dogmatikoki betetzea, emaitza ona lortzea baizik.

  1. Kalabazin ona distirantea da, orbanik gabea, astuna, besaurrearen luzerakoa.

  1. Jaki bati gantza kentzeko: hoztutakoan, kendu azaleran solido dagoena; epela dagoenean, jaso burruntzali edo bitsaderarekin; bero dagoela, ipini azalean sukaldeko paper xukatzailea.

  1. Entsalada epelen osagaietako bakoitzak bere nortasuna agertu behar duenez, hobe da aparte egosi edo prestatzea eta mahairatzeko unean elkartu.

  1. Hatzean labanarekin ebaki edo etentxo txiki bat egin baduzu, jarri berehala ebakian baratxuri buruaren edo atalen azala eta eutsi hor. Ez odola irtengo da, ez infektatuko da.

  1. Txangurroa eta buia (itsaski guztia, oro har) bizirik erostea komeni da: aukeratu astunenak, hutsik ez dauden seinale baita karga hori.

  1. Antzar edo ahatearen gibeletan, askotan bezala, handienak ez dira hoberenak eta galera latza dute, gainera, gantzatsuenak direlako.

  1. Aukeran: meloi ona, astuna; angurri ona, arina; inongo kolpe-arrastorik gabea. Mutur samurra da umatua dagoen seinale.

  1. Kokotxari (saltsa berdean prestatu nahi bada) ez zaio kendu behar muturraren barnealdean duen garau moduko hori, hortxe daukalako jelatina gehien.

  1. Onddo eta perretxikoak lehenbailehen prestatu eta kontsumitu behar dira, elikagai arras efimeroa baitira. Gogoan izan: onddoa jatea beste kezkarik ez du harrak.

  1. Txokolateak, egin denetik, urte erdiko bizia du (nork ez ditu probatu mojek oparitako bonboi zaharrak?). Noiz egin duten ez dakigunez, hobe dugu lehenbailehen kontsumitzea.

  1. Hatzaren tamainako txipiroi txikiak ederrak daude beterik eta tinta-saltsan; koskorrak eta begi haundiak (400 gramoraino), plantxan edo, txirrindolatan, frijituak; handiak, laukitan ebakita, tipuleztaturik edo saltsan.

  1. Ahate-bularkia erre aurretik, hobe da alderdi gantzatsuan ebaki batzuk egitea, urina zeharo eten gabe: horrela beroa aise iritsiko da, jakia lehortu gabe. Arrazoi honexegatik, ez ebaki xerra fin-finetan.

  1. Iledun ehiza azkarrago bera dadin, sartu ur eta ardotan barazki eta belarrak egositako saldan. Pieza aterata, jarri sarexka batean edo aldapan, beratzekoak ongi xuka ditzan. Ehizakia ahalik eta gutxien beratu behar dugu: bi-lau egun gehienez, oilagorra, eper gorria eta basurdea izan ezik (hauek, astebete).

  1. Ez hartu izozkia hotzegi, paradoxazkoa badirudi ere: -10º C-tan aski da eta, hortik behera, zaporeak ezabatu egiten dira.

  1. Arrain freskoaren adierazleak:

  • Usainik ez, ia.

  • Alea osorik, atal guztiekin, distiratsu eta gogorra.

  • Sabela lau, eta uzkia (ipurtzuloa) itxita

  • Begia garden eta hegatsa gorri. Pintatua duen atzemateko, igurtzi hatzarekin.

  • Odol arrastorik ez.

  • Ezkata tente, ongi itsatsia. Gutxi egin, hezurra gorri, tenperatura apalean

  1. Arrainaren egiazko kostua. 100 gramo arrain jateko, erosi behar duzu: 100 g xerra (luzerakoak); 120-140 g trontzo (zeharkakoak); 150 – 175 g arrain burutxiki osoa; 175 – 200 g arrain buruhandi osoa.

  1. Arrainaren aprobetxamendua. Kilo bat jaki erosten dugunean, hona zenbat aprobetxatzen dugun: arrain burutxikitik, 700 g; arrain buruhanditik, 600 g; bakailao gazi osotik, 850 g; muskuilu eta txirletatik, 350 g; krustazeoetatik, 400 g.

  1. Sexuen bereizketa platerean, behintzat, egitea komeni ohi da: arrainetan, zapo eta gadido (bakailao, legatz…) emea (gorputz potoloska) finagoa da arra (buruhandi eta luzanga) baino.

  1. Arrain urdin eta zuriak. Horrela sailkatzea ia alferrikakoa den arren, zenbat gantz duten adierazten da, gutxi-asko. Abuztuan horrela doaz, zurienetik hasita: paneka, erreboiloa, oilarra, zapoa, txitxarroa, bisigua, platuxa, mihi-arraina, itsas aingira, hegaluzea, korrokoia, berdela, krabarroka.

  1. Bakailaoa erostea. Asko saltzen duen dendan eskuratzea komeni da: horrela badakigu arraina ez dela zaharra. Gainaldea ilun eta sabel leun, mehe, zurikoa da bakailao ona, orban horizta edo gorrixkarik gabea, malgua, gardenkara, 2 –2,5 kg.koa.

Leave a Reply

Required fields are marked *


Tresna-barrara saltatu