Aperipintxo

ASTEKO PINTXOA

  1. Nahasi 100 g gazta urdin, 50 g gurin, 2 koilarakada esnegain likido, 2 xerez gozo, erantsi kapar batzuk eta bete horrekin endibien edo kukulu tuterarren hostoak (fruitu lehorrekin tartekatuz, agian).

  1. Ur eta ardo zuritan egositako patata-xerra meheak oliba-olio pittin batez eta gatz-puntta batekin paderan gorritutako pinazi batzuekin garastatu.

  1. Gorritu gurinez ogi-xerrak, gainean izokin keztatua, gainean tipulina xehe-xehe eta limoi-tanta bat.

  1. Jarri moldeko ogi gainean pikilloa (eginik), antxoa eta hezur gabetutako oliba beltza; garastatu, lurrindu, oliozpin xuabe batekin.

  1. Endibia-orriaren gainean izokin keztatua, azenario birrindu xehe-xehea, urdaiazpikoa tira finetan eta gulak, oliozpinarekin, lehengaiez abusatu gabe.

  1. Zuritu eta ebaki xehe-xehe pistatxo ugari; ahuntz-gaztarekin bolatxoak egin, bildu pistatxo birrinduekin eta jarri tomate-xerra banatan.

  1. Bi sagar gazi-gaziri zuztarra eta azala kendu ondoren, xerratan ebakiko ditugu horizontalean. Igurtzi limoi-pusketa batez. Ipini xerra gainetan izokin, amuarrain edo sardinzar keztatua, tipuleta xehatua (oso gutxi) eta beratu ordubetez hozkailuan.

  1. Gurinez xigorturiko ogiaren gainean, xerra mehe-estu bat izokin keztatu, pepinillo eta tipulin xehatuak, kapar batzuk, maionesa.

  1. Muskuilua eta behi gazta, oliozpin bizi-biziarekin, “suediar” ogian.

  1. Oilasko egosia, hezurrik gabeko oliba berdeak eta tipuleta, hirurak xehe-xehe, nahasi eta elkartu maionesa bidez. Antolatu ogi-xerra txiki xigortuetan eta ipini gainean pikillo laurden bana.

  1. Frijitu 8 galeper-arrautza, batera, olio-ttantta batez (kontuz, gorringoa erraz hausten da eta); ondoren, 8 urdaiazpiko-pusketa txiki; berotu azkenik 4 pikillo (8 erdi) eta dena frijiturik dagoela, ebaki ogi integrala xerretan eta antolatu bertan, grazia pittin batez.

  1. Pepinillo eta tipula xehatuarekin, eskabetxeko atuna eta kognak pittin batez susperturiko maionesa, ogi trinkoaren gainean.

  1. Erre parrillan (plantxan, edo frijitu paderan, olio gutxitan) zigala-buztanak eta banana-xerrak; atera eta josi zotzetan.

  1. Txanpinoi bat, ganba bat; erre mikrouhineko labean edo frijitu paderan. Eman gatza.

  1. Piper berde frijitu berrian, sartu gruyére eta york urdaiazpiko xerra mehea; eduki horrela bi minutu eta prest.

  1. Langostinoa eta emmental gazta pusketa, biak tamaina berekoak, josi zotz batez, igurtzi irin, arrautza eta ogi birrindutan, frijitu bizi-bizi eta xukatu.

  1. Gilda: zotzean josi oliba berdea, pipermina, antxoa, pipermina eta oliba berdea.

  1. Karta (mus) baten tamainako hostorean bildu latako antxoa eta gazta ziri bat, bildu eta erre labean.

  1. Tomate-xerraren gainean, piper berde frijitu eta garbitua eta antxoa xerra.

  1. Ogi xigortuaren gainean, pikillo barrubetea: atun eta tipula xehatuak maionesarekin nahasiko dugu, sartu aurretik. Ahoa ixteko, hezur gabeko oliba.

  1. Hostorezko tartaleta gainean, xehe-xehe ebakitako tomatez alaituriko maionesa, letxu-pusketa bat eta bi ganba edo bi muskuilu gainean.

  1. Txipiroiz beteriko piper berde frijitua, “zopako” ogi-xerra mehearen gainean.

  1. Banana, anana eta sagarra, langostinoak eta surimia (“txatka”) koadro txiki-txikitan ebaki. Erantsi maionesari ttantta bat kognak eta jarri dena ogi xigortu edo gaileta gaziaren gainean.

  1. Ostrak dastatzeko beste modu bat: bina, laguneko; gainerre, asko gorritzeke, ogi-xerra finak, eman gurina eta gatz pittin bat, eta jarri gainean ostra-xerrak.

  1. Mikrouhin labean oporto motako ardo pittin batez erretako sagarra ipini hostopilean. Gainean, xerra bat foie-gras.

  1. Zainzuri-burua eta urdaiazpikoa, maionesaz igurtziriko letxuaren erdialdeko orri txikian antolatuko dugu.

  1. Keztaturen bat (izokina, sardinzarra, aingira…) eta surimia xehatu, kaparrak, ilarrak, letxua mehe-mehe ebakia eta tomate xehatua erantsiko dizkiogu maionesari. Dena, moldeko ogi gorrituan.

  1. Hostopilean, arrain zuri eta itsaski egosien pusketak, hotz, maionesaz nahasirik.

  1. York xerra batean bildurik, aguakate, zainzuri, izokin keztatu eta gazta-saltsa, hau da, gazta urdin, esnegain likido eta gurinaz osatu eta perrexilez alaitutakoa.

  1. Nahasi tipulina, pepinillo, tomate eta perrexil xehatuak, ilar eta alkazarrak behi-gazta freskoarekin eta jarri hostopilean.

  1. Ogi frijituaren gainean, elkarrekin salteatu ditugun onddo eta langostinoak.

  1. Oliba beltzak eta tipuleta ebaki baina xehatu gabea oliba-olio ttantta batzuekin utziko ditugu beratzen, lau bat orduz, gozatu aurretik.

  1. Bakailao frijitua, tipula-eraztun irineztatu eta frijituen gainean. Xukatu ongi.

  1. Hegaluze egosia, tipulina, pepinilloa, pipermorroa eta oliba berde txikituak tomate-saltsarekin nahasita.

  1. Arrautza egosi eta york urdaiazpikoa xehatu, nahasi maionesarekin, jarri moldeko ogian eta gainetik ipini izokin keztatua.

  1. Txanpinoiari erantsi gatza, baratxuri eta perrexil xehatua; erre plantxan. Barru-betetzeko, fruitu lehorrak, pusketa txikitan. Tabaskorik erantsi nahi?

  1. York urdaiazpikoa, behi-gazta, letxu orria, tomate xerra, arrautza egosia, dena berdintsu ebakia, moldeko ogian.

  1. Tomate-xerran zabaldu gazta guria, ipini aguakatea, surimia (“txatka”), almejak, pipermin gozoa eta letxu xehatua, dena nahasirik, txikiegi gabe.

  1. Frijitu almendrak su eztian (gorritu gabe) eta eman gatza. Kontuz, erre gabe.

  1. Letxu-orrian, oilasko xehatua tomate-saltsarekin nahasi eta hur xigortuak gainean tolesturik.

  1. Koilarakada bat roquefort eta beste bat esnegain, ttantta bat pattarrarekin paderan urturik, ipini tartaletan. Gainean, arkumearen giltzurrun erreak.

  1. Ogi xigortuaren gainean, maître d’hotel gurina hedatu; ipini gainean xerra bat izokin keztatu eta gainetik izokin- edo korrokoi-arrabak.

  1. Hilaren bukaeran kabiarra, trufak eta ostrak atsegin ez badituzu, karrakelak arakatu eta jostorratzaz ateratzea oso denbora-pasa atsegina da, txakolina edo ur osasuntsua bultzatzeko.

  1. Berdel- edo txitxarroari xerra fin-finak eginik, beratu oliba-olio eta ozpinetan (baita piper berde, gorri, perrexil, tipula, piperbeltz… bururatzen zaizun oro), hiru bat orduz. Xigortu ogi-xerrak eta jarri gainean carpaccio itsastar hori. Bigarrena aiseago sartzen omen da beti.

  1. Tipula eta bakailao beratu xehatuak, oliba-olioz garastatu eta, ondo beratu aurretik, kendu tartetik.

  1. Bi muskuilu (jakia bakarrik) hirugihar-xerra batekin zotzean josi, erre edo frijitu oso olio gutxitan, eta jan bero-beroa, “baserriko” ogi-xerra xigortuekin.

  1. Nahasi 100 g gazta fresko, 100 g roquefort, 3 koilarakada esnegain eta piperbeltz pittin bat. Jarri ogi xigortuetan, erantsi gazta parmarra eta gainerre 2 minutuz.

  1. Ireki 4 beira, garbitu eta gorde korala (baldin badute). Ebaki pusketa handitan eta nahasi 3 koilarakada maionesa, tipulin eta perrexil xehatuekin. Ipini nahaskia ogi-xerra zabal xigortuetan.

  1. Gerezi-tomateak luzeran ebaki eta oliozpinetan beratuko ditugu; biharamunean, behi-gazta xuabe bat koadrotxotan ebaki eta zotzetan josiko ditugu: tomate erdia, gazta eta tomate erdia. Ozpinetako pepinillo-xerra bat erantsi nahi baduzu, asmatzea libre.

  1. Baionako urdaiazpikotik ebaki bi-hiru xerra luzanga. Meloi txiki bati atera bolatxoak erauzgailuarekin. Bildu bolatxoak xerra banatan eta josi zotz batez.

  1. Gernikako piper frijituak. Olioa ez da biziki berotu behar, kanpoaldea bakarrik egin ez dadin. Hobe dugu piper osoa “egostea”, digestio errazekoa jazo dakigun: ez ahantzi ale asko irensten ditugula.

  1. Nahasi jogurta (baita antxoa-gurina) eta gazta urdina, bol txikian. Ebaki azenarioa, Tuterako kukuluak, endibiak, apioa… juliana eran (ziritan), jarri platertxoan. Egin txista.

Leave a Reply

Required fields are marked *


Tresna-barrara saltatu