RZ errazak

  1. Entsaladilla, al dente

Letxua, 10 minutuan egosi eta hozturiko arrautza, tipulina, sagarra, piper berdea, tomatea: ebaki dena pusketa txikitan eta erantsi maionesa.

2 Urdaiazpiko frijitua

Beratu esnetan urdaiazpiko xerrak, bi orduz. Xukatu, bildu ogi birrindutan, gero arrautza-gorringotan eta frijitu. Xukatu berriro, paperean

  1. Bakailao frijitua

Ongi beratu eta gezatu ondoren, ebaki mokadu bakarreko tamainan. Bildu irinetan eta, baratxuri pare bat gorritu dituzun olio horretan frijitu (su biziegi gabe) kolore polita hartu arte.

4. Esparrago eta pikilloak

Erregosi oliba-oliotan pikillo piperrak eta zainzuri-buruak; egin arrauzkia eta atera zukutsu eta beroa.

  1. Antxoa beroak

Garbitu antxoa freskoa (burua erauzi, tripak atera, zabaldu eta hezurra kenduta) eta egin bi xerra. Bildu bi ganba- edo langostino-buztan edo pikillo laurden bat bi antxoa xerrekin eta josi zotz batez. Pasa irin eta arrautzatan eta frijitu. Xukatu, sukaldeko paperaren gainean utzita.

6 Antxoa fresko beratuak: ireki kilo erdi antxoa, kendu burua, barrunbeak eta hezurra. Osatu saltsa: nahasi 1 da olio, 1 da ozpin eta barazkiok: ½ tipula, perrexila, 2 baratxuri, piper gorri eta berdea xehe-xehe. Eduki hortxe beratzen antxoak, egosi arte (6 ordu, gutxienez).

7 Gaztaina egosiak

Sartu mikrouhin labean 6 minutuz, ondoan baso bat ur dutela. Edo egosi gatza eta anis-aleak dituen saldan.

8 Gazta, aukeran

Ebaki koadrotxotan idiazabal, roquefort edo gazta urdina (pusketa txikiagoak, gazi-bizia baita), brie, ahuntz-gazta, urdaiazpikoa… eta, osorik, errefautxoak, hezurrik gabeko olibak, “gerezi” tomateak… Sartu zotz banatan eta josi hauek sagar-, ogi-, tomate-xerratan, luzeran ebakiriko aza hostoetan… nahi duzun tokian, baina gustuz, agerpena zainduz.

9 Alberjinia frijituak

Berenjena ertain bat garbitu uretan, zuritu gabe ebaki xerra mehetan (zeharka, handiagoak izan daitezen), eman gatz eta piperra. Plater batean irina duzu, beste batean arrautza irabiatua eta hirugarrenean ogi birrindua. Iragazi xerrak denetatik ordenu horretan eta gorde hozkailuan 2 orduz. Frijitu, atera paper xukatzailera eta eraman lagunengana.

10 Entsalada zaharberritua

Betiko entsaladari (letxuga, tomate eta tipula) edo beste bati erantsi jogurta, albaraka edo erromero pittin bat (xehatuta), ttantta bat limoi, gatza eta piperrauts beltza. Nahasi, oliozpin tradizionalaren ordez edo laguntzaz.

11 Antxoa arrautzeztatua

B Kendu antxoari burua eta ireki, luzeran, hatz erakuslea burutik atzera hezurraren kontra ekarriz, arrainari beste eskuarekin heltzen diogun bitartean; ondoren, kendu hezurra, zabaldu antxoa eta eman gatza. Igurtzi irinetan eta murgildu arrautza irabiatuan. Frijitu. Olioa xukatzeko, jarri erretiluan sukaldeko papera.

12 Taloa

Taloa egiteko nahasi arto-irina, ur beroa (puskaka erantsiko diozuna, irinak irentsi ahala) eta gatza. Eragin eskuz, indartsu. Hartu bola horretatik sagar txiki baten tamainako pusketak eta zabaldu. Erabili horretarako arrabola edo botila, irinez zikinduta (masa ez itsasteko). Segi zabaltzen: zenbat eta meheago, orduan eta kraskatsuago, finago izango da taloa. Erre orain parrillan, plantxan edo, besterik ezean, padera zahar batean. Egokiena, egosi gabeko zatirik ez aurkitzea da.

13 Bakailao-entsalada soila

H Entsalada edo “piskolabis” (latinetik: pisco, harrapatu; labiis, ezpainekin) hau prestatzeko, hartu 300 g. bakailao beratu, 200 g. tipula xehe-xehe ebakita, 1 da oliba-olio. Desegin eskuz bakailaoa, pusketa txikitan. Nahasi dena eta, aukeran, erantsi sagardo-ozpina (amiñi bat bakarrik).

14 Antxoa txikien arrauzkia

Antxoa txikiak iragazi uretatik, asko gabe, eman gatza eta, baratxuria gorritu dugun olioan, buelta pare bat emango diegu, bizi-bizi. Irabiatu arrautzak eta erantsi paderan bertan. Zukutsu dagoenean, jan lasai asko.

15 Piper-mosaikoa

E Hartu 2 piper hori, 2 pipermorro eta 2 pikillo. Galdarraztatu paderan, oliotan eta estalkia jarrita, azala kendu ahal izateko. Epeldu direnean, zuritu, kendu haziak eta egin xerra luzeak: beratu hauek oliba-olioan pare bat orduz. Ogi-xerra lirain xigortuen gainean. Gatza (eta, gustukoa baduzu, piperbeltza), azkenean.

16 Hanburgesak

Hartu (erosi) lau lagunentzat, 500 g haragi xehatu, 2 arrautza, 40 g. ogi birrindu, basoerdi bat esne, perrexil xehatua, gatza. Irabiatu arrautzak bol batean eta nahasi dena bertan. Egin hamabi bat bola eta zanpatu irinez zikindutako plater batean. Frijitu eta pronto.

17 Entrekota ardo beltzez

Bi lagunentzat prestatzeko, hartu 2 entrekot, 1 tipula txiki, basoerdi ardo, basoerdi salda, basoerdi esnegain, olioa eta gatza. Gutxitu salda (pastillakoa edo hezur muinez eginikoa), esnegain eta ardoarekin erdiraino. Xehatu tipula eta sartu saldan. Tipula deseginik, eragin saltsari eta, lodi dagoela, ipini plateretan. Frijitu edo erre xerrak, bizi-bizi, odoltsu utzita.

18 Oilasko-entsalada

Oilasko erre edo egosia xehatu behar da, eta ondoren letxua juliana (xerra finetan) ebakia, tipula xehatua eta maionesa erantsi, geure gustura: horra hor udako afari freskoa

19 Pà amb tomàquet

Xigortu ogi-xerrak, igurtzi baratxuriz eta tomate heldu-helduen erdiekin hurrena; azkenean, oliba-olio pittin bat eta horra pà amb tomàquet. Tomatea pure eginik gustukoa ez baduzu, galdarraztatu ur irakinetan, zuritu eta ebaki koadrotxo edo xerra finetan.

20 Izkira salteatuak

Padera itsasgaitz batean ipini kafe-koilarakada txiki bat gatz eta piperbeltz eho berria, berotu. Piperbeltza jauzika hasten denean, erantsi ½ kg izkira eta zarrastatu bertan bi minutuz. Itzali sua eta gehitu kopakada bat oliba-olio ona. Eraman txakolina zain dagoen tokira.

21 Patata-entsalada

H Egosi hiru patata eder, galant. Ebaki xerratan eta utzi freskatzen. Nahasi gazta freskoa, perrexil xehatua, kaparrak eta latako antxoa-xerrak pusketa txiki-txikitan. Zabaldu patata-xerrak platerean, busti oliba-olioz eta antolatu nahaskia xerra gainetan.

22 Baratxuri-zainen arrauzkia

Salteatu baratxuri-zainak oliotan. Samurtu direnean, xukatu gehiegizko olioa. Irabiatu arrautza eta erantsi paderara, eragin eta zeharo egin aurretik, mahaira.

23 Behi-gazta

Litro bat behi-esne epeldu, erantsi pikondo-orriei kendutako 3 cl (ditarekada bat) latex (pikondoaren zuku zuria), utzi epeltzen eta gazta egin duzu, konturatzeke.

24 Txipiroi txiki erreak (plantxan edo paderan)

Garbitu txipiroi txikiak: gorde “zakua”, ireki, zabaldu eta erre plantxan, minutu pare batez, zeu gainean izaki, arrainak zanpatuz, etc. Busti oliozpinarekin (oliba-olioa, sagardo-ozpina, tipuleta eta tomate xehatuak, gatza).

25 Arkumearen gibelerraiak

Eskatu harakinari, ebakita (behar izanez gero). Oliba-olio, baratxuri eta perrexiletan beratu ondoren, xukatu gehiegizkoa, bildu ogi birrindutan, frijitu paderari estalkia ipinita eta dastatu berehala.

26 Arrautza frijituak

Gutxieneko baldintzak: arrautzak fresko izatea (egun, normala), olio horretan arrainik edo tejoa utz zezakeen deusik frijitu ez izana, eta padera garbi egotea, bitsadera bezalaxe. Tanta bat ur eroriz gero, neutraldu ezazu gatz pittin batez, baina bizi-bizi, erre gabe.

  • Lehortu padera, ipini bertan olioa eta dena su bizian.

  • Ogi-papur bat oliotan utzi eta aparra hurbiltzen bazaio, pronto duzu tenperatura.

  • Hartu arrautza bat esku batean eta kask!, egin plateraren ertzaren kontra. Zabaldu bi erdiak eta utzi platerean erortzen. Kendu oskol kondarrak hatzarekin eta utzi labaintzen oliotara.

  • Zuringoaren azpialdea egina dagoela ikusi duzunean, lagundu bitsaderarekin, olio beroa gainetik botatzen, xuabe-xuabe: gorringoa pelikula zuri batekin jantziko duzu. Kendu bitsadera bertatik arrautza egin arte (beste 1 – 2 minutu) eta, azkenean, sartu bitsadera azpialdetik eta, arrautza airean baina ez goialdeetan, inklinatu pittin bat, olioa ongi xuka dezan.

  • Pasa platerera eta miraria eginda duzu. Minutu pare bat baino gehiago ez luzatzen saiatu, gorringoa fluido atera dadin.

  • Zuringoaren ertza kizkurtua nahi bada, olioa dezente berotu beharko; kizkurrik gabe gura izaki, epeldu olioa.

  • Ekonomietan murgildurik, azken arrautza sua itzalita egin dezakezu.

27 Baba freskoak

  • Eltze azkarrean 150 g urdaiazpiko, tipula txiki bat xehe-xehe ebakita eta 4 baratxuri xerratuta gorritu ondoren, 600 g baba fresko erregosiko ditugu.

  • Erantsi baxoerdi bat ur eta estali eltzea.

  • Lurrunka edo txistuka hasi denean sua itzaliko dugu.

  • Eduki bertan beste 4 minutuz.

  • Mikaztasuna arintzeaz gainera, baba hauek fin eta goxoago gertatuko zaizkizu baldin eta, pazientzia handia (ez gehiegi) eta labana txikia hartuta, alea biltzen duen azala kentzen badiezu. Alde ederra.

28 MIKROUHIN LABEAN ERRETAKO SAGARRAK

  • Garbitu lau sagar, erauzi zuztarra, bete zuloa ezti, aran-pasa edo azukrez eta antolatu erretiluan, erdialdean baso bat ur dagoela.

  • Sartu mikrouhin-labean eta eduki 6 minutuz. Labea itzalita, itxaron beste minutu bat. Atera lehertutakoak eta sartu berriro erdi gordinik geratzen direnak.

29 MELOIA LIMOI ETA YOGUR KREMAZ

  • Birrindu limoi baten azala. Ipini kazola batean zukua, azal-hautsak, baxoerdi bat ur eta 4 koilarakada azukre. Egosi su eztian, 8-10 minutuz. Erantsi jogurt bat eta irabiatu, dena berdindu arte.

  • Ireki cantalupo motako meloi bat, kendu haziak eta ebaki pusketa erregularretan.

  • Sartu dena hozkailuan. Aurkezpena: azpian saltsa, meloi pusketak gainean eta menda-adaska bat ertzean dagoela antolatuko ditugu, dotore-dotore. Erraz, merke, polit, fresko… beste deus nahiago ote?.

30 Melokotoi erreak

  • Lau lagun edo adiskiderentzat lau melokotoi eder aukeratuko ditugu. Gerri-buelta osoan ebaki txiki bat egingo diogu azalari, fruitua leher ez dadin.

  • Sartu, ur edo ardo zuri pittin batekin, labean (180º C).

  • Melokotoi-barietatearen arabera, alde handia dago batetik bestera. Itxura esferiko samarra galtzen hasia dagoela ikusten duzunean, ukitu hatzarekin: honek aginduko dizu erretzen segi ala labetik ateratzea.

  • Hoztutakoan, esnegain harrotua dute lagun polita, udaran.

31 Saltsa bordelarra

Txanpinoiak, haragiak, hegaztiak, arrain zuriak eta beste laguntzeko aproposa, eltze azkarrean egingo dugu saltsa hau.

  • Berotu 100 g gurin eta 1 da olio, erantsi 200 g txalota (edo, txalotarik ez baduzu, porrua, baratxuria eta tipula) xehe-xehe ebakita.

  • Gorritzen hasi zaizunean, gehitu piperrauts zuria edota beltza, ezkaia, perrexil xehatua eta ereinotz-hostoaren laurdena.

  • Erantsi, ondoren, ¼ l ardo beltz edo zuria (baina ona: merezi du), zaletasunen arabera, eta baxoerdi bat ur. Itxi eltzea eta utzi egosten 5 minutuz.

  • Hoztu denean, iragazi saltsa (koladoretik, jakina) eta, arinegi baldin badago, loditu: baxoerdi bat uretan disolbatu koilaratxokada bat arta irin, hatzarekin, eta saltsa irakiten ari dela, bota. Eduki horrela berriro irakin arte, gordin-tejorik izan ez dezan.

32 Olagarroa

  • Eltze azkarrean lehenago bukatuko da egoskera: merezi du, oktopodo edo zortzi hankako hau aski gogorra baita. Nahi baduzu, eduki olagarroa (txikia, aukeran) pare bat ordu izozkailuan, okelaren zuntza hautsi edo leher dadin, atera eta orduan, ebaki.

  • Ipini eltzean, sutan, ½ l ur gazi; irakiten hastean, sartu olagarroa eta itxi lapikoa: ordu erditik hiru laurdenera eman beharko du hortxe.

  • Egina dagoenean, atera erratilu edo platerera.

  • Xerratu 4 baratxuri eta erregosi, su eztian, 1 da oliotan. Tenperatura pittin bat jaitsita, erantsi koilaratxokada bat piperrauts gorri gozo, min edo nahien duzuna. Garastatu honekin zefalopodoa.

33 Dilistak

  • Ezinbestekoa ez den arren, dilistak eta lentejak uretan 12 orduz beratzea hobesten dugu.

  • Ipini eltze azkarrean 400 g dilista eta barazkiak, xehe-xehe: 1 azenario, 1 piper berde, 1 porru, 2 baratxuri, 1 tomate heldu, perrexila. 2 piper pikillo, tiratan, eta gatza.

  • Aukeran, erantsi 4 pusketa txorizo fresko edota 4 pusketa urdai.

  • Estali dena urez eta erantsi beste basokada bat. Itxi eltzea.

  • Irakinean 6 minutu egin duenean, xehatu tipula txiki bat eta frijitu 1 da oliotan, paderan.

  • Hoztu eltzea, ireki eta erantsi frijikia. Prest.

34 TOMATE-FRESKAGARRIA

  • Garbitu uretan 1 kg tomate heldu (badago poteko tomate birrindua: erosoago, aukeran), zuritu gabe, kendu zuztarrak; zuritu 2 baratxuri eta txikitu labanarekin; jarri dena ontzi sakon batean; sartu irabiagailua eta txikitu dena.

  • Ondoren, iragazi txinotik edo beste koladoretik beste ontzira (honela ez duzu garbitu beharko oliorik).

  • Bigarren ontzi honetan, erantsi 1 da olio, ozpina eta gatza, zeure gustura. Erantsi jela edo sartu hozkailuan pare bat orduz.

18 Oilasko-entsalada

Oilasko erre edo egosia xehatu behar da, eta ondoren letxua juliana (xerra finetan) ebakia, tipula xehatua eta maionesa erantsi, geure gustura: horra hor udako afari freskoa

35 SARRERA SOIL-SOILA

  • Birrindu 3 azenario, xehatu 2 tipulin, ebaki xerra mehe-mehetan errefautxoak (gustukoak badituzu), eta kito.

  • Azpilaren alderdi batean azenario birrindua, tipulin xehatua eta errefau txirrindolak jarri, bestean 2 da maionesa eta erdian solasgai polita

36 OILASKOA GARAGARDO BELTZAZ

  • Garbitu 1,5 kiloko oilaskoa: kendu azala (hegaztiak kolesterol guztia azal azpian dauka) eta txikitu 12-16 puskatan. Eman gatza.

  • Jarri sutan eltze azkarra. Baxoerdi bat oliotan 4 baratxuri, osorik, berotzen ari diren bitartean, xehatu tipula koxkor bat.

  • Salteatu oilasko-pusketak, launaka, su bizian, hau da, frijitu kanpotik bakarrik, barnealdea gordin utzita.

  • Denak zarrastatu ondoren, geratu den olioan erregosi —hots, su eztiz frijitu, janak kolorerik hartu gabe— tipula, pitin bat gorritu arte.

  • Erantsi berriro oilasko puskak, gehitu zerbeza. Itxi lapikoa eta, hamabost bat minuturen buruan, dastatu.

Garagardo beltzak bouquet politagoz janzten du jakia. Estalkia jarrita egin dezakezu, egospena azkartzeko, baina irabazitako denbora guztia “gastatu” beharko duzu gero, gehiegizko likidoa lurrundu arte. Edateko, zerbeza ona. Eta jakia hornitzeko, berriz, entsalada edota patata-purea, etxekoa.

37 Barazkiak frijitzeko oreetako bat: tenpura

Nahasi, bol batean, 250 g. irin, 50 g. gurin urtu (edo oliba-olio), 2 arrautza, gatza. Erantsi ura, ore erdi-likidoa lortu arte. Handik ordubetera prest daukazu frijikiak (piperrak, kalabazin-xerrak, txanpinoiak, patatak, zerba-zainak, ziazerba-bolatxoak, orburu erdi edo laurdenak, azenario egosiak, gardu-xerrak, borraiak, txikoriak, letxu-“zigarroak”…) blaitu ondoren, frijitzeko.

 

38 “Kurri” aginarraren oroitzapeneko arroz-entsalada

 

  • Egosi 1 basokada arroz 2-3 basokada uretan.
  • Baita 2 arrautza, 2 azenario, eta 100 g. ilar (latakoak nahi ez badituzu). Hoztu.
  • Xehatu tipulina bat, ebaki tomatea heldu bat txiki-txiki.
  • Egin maionesa: arrautza bat, 1 da olio, ozpina, gatza, dena bere basoan. Sartu irabiagailua eta, hondokoa homogeneo dagoenean, altxa pixkanaka trastea, gelditu gabe. Bi koilarakada tomate, kognak edo baratxuri bat erantsi nahi?
  • Nahasi 50 g. arto, 8 antxoa-xerra latako, eskutada bat hezur gabeko oliba beltz eta beste horrenbeste berde, eta gatza.
  • Begiratu pusketak arroza baino askoz handiagoak izan ez daitezen.
  • Nork bere platerean erantsiko dio saltsa.

39 Perrexilezko saltsak (1)

– ”Maître d’hotel”: gurina, ardo zuri, limoi-zuku, piperbeltz eho berri eta perrexil xehatuak osaturik, zapore moteleko arrain eta hegaztiei bizitasuna eransten die.

Jarri bol batean 100 g gurin, baxoerdi bat ardo zuri, limoi erdiaren zukua, koilarakada perrexil xehe eta koilaratxokada erdi bat piperbeltz eho berri, eragin eta nahasi dena eskuz. Zabaldu masa hori aluminiozko paperean, moldatu zilindro bat, gorde hozkailuan eta itxaron. Hoztutakoan, “txorizo” horri zirrindolak aterako dizkiozu patata egosiei edo oilasko gesalari gehitzeko, adibidez.

40 Perrexilezko saltsak (2)

  • Gremolada: Italiako iparraldean sorterria duen ongarri hau, xehe-xehe eginiko laranja- eta limoi-azalak, baratxuriak eta perrexilak osatzen dute. Egospen luze eta gantz ugariko platerei azken unean eransten zaie, freskotasun apur batez apaintzeko.

41 Perrexilezko saltsak (3)

  • Persillada: ez garraio azkarrik, ez hozkailurik zegoen garaietako oroigarri hau ezaguna ez ezik, ezinbesteko bahea dugu geurean ere: baratxuri eta perrexil xehatuz osatua, erre eta frijituei gehitu zaie, ontzea bukatutakoan (agertzerik nahi ez genituen usain, beltzune eta gainontzekoak ezkutatzeko, gehienetan).

  1. Hostopilak

Beratu ron edo koñaketan 100 g mahaspasa txiki; nahasi 200 g gazta fresko, 2 da esnegain eta 100 eztirekin, ipini hostopiletan eta ez utzi beratzen.

43 Puxtarri-mazedonia

Bolatxoak erauzteko koilararekin meloi, kui, banana, azenario, sagar eta gainontzekoen pusketak atera ondoren, sobra diren fruta-hondarrak malats elektrikoan birrinduko ditugu. Beratu dena anana-zukuan eta, meloi-azalean bertan, zerbitzatu ilunabarrean.

  1. Laranja eta intxaurra

Zuritu laranja, ebaki xerra finetan eta zabaldu platerean. Ebaki, fin samar, 3 edo 4 intxaurren mamia eta zabaldu xerren gainetik.

45 Bainila-izozkia eta laranjen zukua

Zerorrek nahi duzun puntuan nahasia edo nahasi gabea.

  1. Praliné eta platanoa

Erregosi paderan almendra xehatuak eztiarekin eta, gorritzen hasitakoan, ipini bertan platano-xerrak. Hostopilaren gainean, tajasta, eginik dago, alegia.

47 OILASKO FRIJITUA

  • Lau lagunentzat hartu kilo eta erdiko oilaskoa, kendu azala, ebaki pusketa txikitan, eman gatza eta igurtzi baratxuri eta perrexil xehaturekin.

  • Berotu olioa eta frijitu pusketak bertan, ongi gorrituz. Baratxuri-pusketak belztu ahala, kendu oliotatik. Oilasko-pusketak frijitu ahala, utzi sukaldeko paper xukatzailean.

48 MARRUBI-HORNIGAIA

Azken marrubiak badoaz-eta, oraintxe duzu aukera kilo batzuk hartu, garbitu, egosi eta, birrinduta, jelatzeko. Toki gutxi beteko dizute izozkailuan. Udarako postreetako saltsak edo udazkeneko ehizaren osagarriak prestatu ahal izango duzu honela. Botila batean erdiraino edo, sartu marrubiak eta bete anis gozo-lehorrez. Gorde ilunpean negura arte.

Leave a Reply

Required fields are marked *


Tresna-barrara saltatu