RZ postreak

1 ALMENDRA-ZOPA

  • Egosi 1 l. esne 100 g. azukre eta kanela zotz batekin.

  • Irakiten hastean, itzali, bota bertara 150 g. almendra birrindu eta 150 g. zopako, xerra finetan ebakia.

  • Piztu labea 125º C-tara.

  • Igurtzi moldea koipez eta jarri ore horren parte bat, gainean almendra birrindu, kanela hautsa eta azukrea (aurretiaz nahasita), berriro orea, berriro kanela, etc., dena bukatu arte.

  • Itxi moldea aluminiozko paperarekin eta sartu labean. Eduki bertan hiru orduz, itzali eta utzi moldea bertan, hoztu arte.

  • Atera azpil batera, apaindu almendra eta kanelarekin, eta erre azukrea, apaingarria errematatzeko.

Hauxe izan da luzaro jende xumearen Gabonetako postrea Nafarroako Erriberan.

2 ANANA- ETA KOKO-TARTA

  • Prestatu orea, 120 g irin, 60 g gurin, 1 koilarakada azukre, 1 arrautza, 1 zorro esne-hauts (koilarakada erdia), gatza eta ur pittin batekin. Landu eskuz eta utzi pausatzen, 30 minutuz.

  • Nahasi 2 arrautza-gorringo eta 2 koilarakada azukre, irabiatu.

  • Erantsi 200 g gazta fresko (edo jogurt), 100 g. koko birrindu eta nahasi.

  • Nahasi irina eta legamia, iragazi eta erantsi aurrekoari.

  • Harrotu zuringoak elur-punturaino eta gehitu gazta-kremari, poliki-poliki.

  • Ipini hasieran esandako orea gurin eta irinez igurtzitako molde zabalean; ziztatu sardexkaz.

  • Ore gainean hedatu krema (erdia edo). Honen gainean, 2 xerra anana pusketan txikitua. Gainean, krema berriro ere.

  • Sartu labe ertainean eta eduki 40-45 minutuz.

3 ARKAZI LOREAK EZTIZ FRIJITUAK

Arbola honek lore zuriak ditu, barra-barra oraintxe bertan. Kendu arduraz, garbitu ur hotzez, lehortu oihal batez eta, beratu kognak edo horrelako pattar batean. Xukatu eta, irin eta arrautza irabiatuan igurtziz gero, frijitu olio berotan kontu handiz. Paperezko zerbileta gainean utzi xukatzen minutu batez. Bakoitza­ri, gainetik, tanta bat ezti. Arrosa-petalo batzuek gustuz ipinita xarmantki osatuko dute aurkezpena, kolorez eta usainez.

5 BANANA-KREMA (J. Urrutikoetxea)

  • Bezperan, sartu bost banana heldu-helduak hozkailuan, belztu daitezen.

  • Xehatu 25 g (garbi) kakahuete.

  • Zanpatu bananak sardexka batekin eta birrindu.

  • Nahastu bananak, kakahueteak, limoi baten zukua eta eskutada bat mahaspasa.

  • Jarri zartaginean, berotu su eztian; irakiten hasten denean, eduki, espatularekin eraginez, krema loditu arte.

Epel edo hotz jan daiteke krema hau, gaileta, ogi, hostopil edo beste zerbaiten gainean, krepeak zein suffleak barru-betetzeko…

6 BORRAI HOSTO GOZOAK

 

(Inazio “Pichorradicas” etxeko asmakuntza)

Kopuruak: 12 borrai hosto, irina, arrautza, olioa, azukrea

Tresneria: platerak, padera, bitsadera, azpila

Denbora: gutxi

 

Garbitu eta lehortu hostoak. Irinez igurtzi eta blaitu arrautzetan.

Paderan jarri aski olioa, su ertainean. Frijitu bertan borraiak, banan-banan.

 

Azpilean ipini paper xukatzailea eta bertan utzi frijitutakoak. “Garastatu” azukrez eta zerbitzatu berehala. Hoztutakoan ez dira gauza bera.

 

 

7 ENSARINADAK

 

Paderan txintxorrak edo txantxigorriak (urdai-azalak) jarri, erantsi azukre asko eta, karamelizatu direnean, xehatu aizkora edo ganibetaz. Landu hauek ogi-orez, zabaldu eta, mehe-mehe daudela, hautseztatu gainetik azukrea eta kanela. Sartu labean, ogia egin dadin.

 

 

8 ESNE FRIJIKIAK

Ahiezkoak. Imini esnea egosten azukerea eta kanelagaz. Aparte, bota hiru koilarakada urun esne hotzetara. Irabiatu ondo eta bota irikiten dagon esneari. Dana irikiten aukin ordu lauren baten. Gero atera eta, bota fuente azal batera eta hotzitu deitela ondo. Gogortu egiten da. Gero, zatitu ahie kuadrutxoak eta oriotan prijidu eta bota ganetik azukerea.

12 PARRILAN ERRETAKO FRUTA-BROTXETA

  • Josi zurezko ziri batean platano, kiwi, sagar, udare, melokotoi… eta ahal dituzun fruta guztiak pusketetan, eta besteak (marrubi, mugurdi, mahatsak) osorik, zurituta.

  • Erre ikatzetan eta, gorritutakoan, garastatu limoi- edo laranja-zukuarekin.

  • Zuk ikusiko duzu eztia ongi datorkien.

13 FRUITU LEHOR GARRAPIÑATUAK

Nafar herri askotxotan honela garrapinatzen dituzte fruitu lehorrak:

  • Igurtzi sukaldeko marmola olioz (plater baten adinako azalera)

  • Hartu katilu bat fruitu lehor (almendra, intxaur, kakahuete, anakardo, pistatxo…) gordin, oskolik gabe baina azalarekin, katilu bat ur eta beste horrenbeste azukre, eltze edo kaleta batean, su bizian.

  • Eragin, eten gabe. Eginda daudela, urrundu sutatik eta segi lantzen.

  • Ekarri berriz sutara eta, itxura polita dutenean, hustu olioztaturiko marmolean.

  • Zurezko bi tresnarekin banandu denak (kontuz, azukrea bero-bero dago eta).

11 “MARTZELINA” FRUTA PUDINA (Xatur Eraña)

  • Zuritu eta txikitu hainbat fruta ale (banana, sagar, marrubi, udare, kiwi, anana, meloi, gerezi, mango, melokotoi, aran eta eskura dituzun gainontzekoak), 800 g garbi osatu arte.

  • (Aukeran: beratu dena labean, su ezti-eztian, ordubetez, almibar eta limoi-uretan)

  • Igurtzi moldea gurinez edo karameluz.

  • Berotu labea 180º C-tara.

  • Nahasi eltzean ½ l esnegain, 4 arrautza, 250 g azukre. Murgildu hortxe fruta-pusketak eta bete nahaski horrekin moldea.

  • Eduki labean, maribainuan, budinaren barrualdeak likido guztia galdu arte (ez lehortu arte).

  • Egosi 2 baso uretan fruten azal eta zuztarrak. Erantsi 2-4 laranjaren zukua eta azukrea. Urritu sutan eta, erdira etorritakoan, horixe duzu saltsa budina lagundu eta, biak hotzik, jateko.

10 FRUTA-ZOPA ETA -ENTSALADA

 

  • Zuritu eta ebaki 1 banana, 1 errezil sagar, 1 udare (negutar gogor horietakoa), 2 melokotoi erdi (potokoak, ezinbestez) eta eskura dituzun gainontzekoak. Ez egin pusketa ñimiñoegiak: txikiegi gabe dotoreago geratzen dira.
  • Bolaren azpialdean 2 jogurt natural zabaldu, bota gainean laranja baten zukua.
  • Fruta pusketak, nahi erara: koloreka edo denak nahasirik, artistaren irizpidez. Ez nahasi dena.

14 GAZTAIN BISKUITA

Osagaiak: 250 g. azukre edo ezti, 8 gorringo, 750 g. gaztaina, 1 l. esne, 300 g. esnegain likido.

Lana: Erraza. 30 min, izozkailuan 6 ordu

Lanabesak: padera, eltze txikia, egurrezko koilara, turmixa (xehagailu elektrikoa), moldea

Begia kendu eta egosi gaztainak esnetan 10 minutuz. Bitartean, harrotu nata, hotzik, turmixez. Zuritu gaztainak eta xehatu elektromalats horrekin, pure bihurtu arte. Egosi azukrea uretan, su txiki-txikian (30º C). Azukrea urtu denean, erantsi gorringoak, nahasteari utzi gabe. Erantsi purea eta gaina, azkenean.

Masa hau moldean jarri eta sartu izozkailuan. Moldetik ateratzeko, murgildu hau ur beroan, irauli azpil batean eta lagundu txokolate beroz, marmeladaz, eztiz, fruta-saltsaren batez, pattar flameatu batez edo… zer dakit nik!

15 GIRLATXEA

Osagaiak: 250 g. almendra txigortuak puskatan, 250 g. azukre, 50 g. ur, limoi azala, oblea.

  • Azukre, limoi azal eta urez karamelua egin, pittinka, paderan.

  • Txigortu labean edo beste paderan almendrak eta txikitu, gehiegi gabe. Nahasi dena.

  • Ipini obleetan (edo marmolean) mehe-mehe eta, oraindik bero dagoela, moztu xerrenda­tan.

16 BEIZAMAKO GURIÑE

  • Jarri sutan eltze txikian ½ l esne kanela-zotz batekin; irakin duenean, kendu kanela.

  • Beste kazola batean 7 arrautza-gorringo eta katilu bat azukre irabiatuko dugu.

  • Eragiteari utzi gabe, gehitu irakiniko esnea.

  • Jarri krema hori karameluz tapizaturiko moldean eta, maribainuan, sartu labean ¾ orduz, su ertainean.

17 HUR ETA MASUSTEN TARTA (Patxi Abad)

  • Hartu eskutada handi bat hur, bi (eskutada) masusta eta errezil sagar potolo bat, txikituta.
  • Egosi dena ordu laurden batez, iragazi eta gorde.
  • Presta ezazu bizkotxoaren orea: bizpahiru arrautza azukrearekin irabiatu eta hauts bihurturiko eskutada bat hur.
  • Jarri irabiaki hau moldean, aurrekoa honen gainean eta eduki labe eztian ordu erdi batez, hor nonbait.

19 INTXAURTARTA IRIN GABEA

  • Ebaki labanarekin, xehe-xehe, 200 g. intxaur (garbi).

  • Eltze batean urtu 100 g. gurin eta nahasi 200 g. azukrerekin. Atera sutatik.

  • Nahaskia epeldu denean, erantsi 4 arrautza-gorringo.

  • Harrotu elur-puntura 4 zuringo eta nahasi eltzekoarekin.

  • Igurtzi olioz moldea eta, nahaski horrekin bete ondoren, sartu labe eztian (125-150º C).

  • Koloreak adieraziko dizu noiz atera behar den.

10 INTXAURSALTSA (Gorrotxategi)

Osagaiak: 1 l. esne, 1 l. esnegain, 300 g. intxaur xehe-xehe, 300 g. azukre, kanela-zotza eta limoi-oskola.

  • Xehatu intxaurrak, hauts bilakatu arte

  • Irakin esnea eta esnegaina, kanela-zotz eta limoi-oskolarekin

  • Erantsi intxaurrak.

  • Hortik 5 minutura, erantsi azukrea eta eduki 3 minutuz horrela. Ez utzi eragiteari.

20 LIMOI APARRA

  • Irabiatu bost arrautza-gorringo, hiru limoiren zukua eta bost koilarakada azukrerekin.

  • Sartu mikrouhineko labean hiru bat minutuz, atera, eragin berriro eta sartu ostera labean, beste hiru minutuz.

  • Hoztu direnean, harrotu bost zuringoak, nahasi bestearekin eta hoztu erabat hozkailuan.

21 KAPUTXINA

Irabiatu 12 gorringo, harro eta tinko bihurtu arte, erantsi 25 g maizena eta ipini gurinez igurtzitako moldean. Egosi, estalita, mari bainuan ordu erdiz, urak irakin gabe. Atera eta jarri aluminiozko paperean. Osatu sirope bat, 500 g azukre, 300 g ur eta kopakada bat ronez, egosi irakin arte eta blaitu horrekin gorringoa. Utzi beratzen biharamunera arte eta xukatu sarexka gainean.

22 KHAUSERA ETA KRUSPETAK

 

Kauserak edo buñueloak gauza bera dira: legamia, garagardoa edota bestelakorik erantsita, irina duen oreak epelean hartzirik, koilarakadak banan-banan hartu eta olio bero-beroan frijituko duzu. Azkenean, beti bezala: bete kremaz eta garastatu azukre eta kanelaz. Oretan anis-aleak sartu nahi izanez gero, ondo.

 

Kruxpetak Lapurdin (gutxienez) egiten dira, galirina, azukrea eta arrautza nahasi, uretan egosi eta azkenean gozatuz.

 

 

23 KONPOTA NEGUKOA

 

  • Egosi kazola batean, ardo beltzean, orejoiak (melokotoi lehortuak), aran pasak eta piku melatuak, kanela-zotz batekin.
  • Guritu direnean, erantsi neguko udare gogorrak eta errezil sagarrak, pusketan. Eduki hauek samurtu arte, zuzendu gozo-puntua azukrea edo ardoa erantsiz, itzali sua eta egon.
  • Bezperakoa goxoago izaten da.

 

 

24 KONPOTA UDATIARRA (Jon Tapia)

  • Jarri eltzean Nafar Erriberako litro bat ardo beltz eta 200 g azukre, su eztian. Irakinera iritsi gabe, erantsi lau melokotoi pusketan. Oraino gogortxo daudela, atera ardotatik eta gorde.
  • Egosi lau udare trinko eta, azkenik, bi sagar, denak pusketan.
  • Saldarik baldin badago oraino, dasta ezazu: behar badu, erantsi azukrea eta egosi bertan kanela-zotz erdi bat.
  • Erantsi egositako frutak eta bukatu egospena.
  • Utzi hozten, zerbitzatu aurretik.
  • Salda ugariago eginez gero, baduzu zerekin lagundu: zurrakapote izeneko eden baten formula ederki ezagutzen dute euskal azti eta sorgin askok.

 

25 LARANJAZKO MOUSSEA

Berotu bi laranjaren zukua eta urtu bertan 6 lama jelatina, zeharo desegin arte. Erantsi hori 200 g krema pastelerari. Irabiatu 200 g arrautza zuringo eta 50 g azukre, sendo harrotu arte. Harrotu 250 g esnegain. Elkartu hiru nahaskiak, nahasi poliki baina ondo. Eratu, apaindu eta hoztu.

26 MAMIA

Osagaiak: 1 l. ardi esne, gatzagia (berezkoa edo botikakoa)

Tresneria: katiluak edo beste ontzia, eltzea, burruntzalia

Denbora: ordubete

  • Erantsi koilaratxo erdi bat gatz esneari eta irakin bi aldiz. Utzi epeltzen, hatza sartzean bere tenperatura sumatu arte.

  • Bitartean, desegin baxoerdi bat ur epeletan gatzagi puska bat, oihal-mutur batean bilduta (zikinkeriarik gal ez dezan).

  • Banatu katiluetan gatzagi-ur ttantta batzuk. Banatu esnea eta ez mugitu, gogortu arte. Utzi freskatzen, hotzetaraino iristeke.

27 MAZAPANA

Osagaiak: 250 g. almendra birrindua; 250 g. azukre; (100 g. patata-pure) ;

100 g. azukre, 100 g. ur.

  • Almibar bat egingo dugu, 100 g. azukre 100 g. uretan urtu eta su ezti-eztian berotuz.

  • Nahasi osagai guztiak, landu eskuz eta egin pilaskak. Jarri hauek oblea banatan edo eman gurina labeko plakari.

  • Gainetik pintatu arrautzaz, eman glas azukrea edo estali almibarrez.

  • Berotu gainaldea, gorritu eta atera.

29 MELOKOTOI ERREAK

  • Kontua da eltze azkarrean, labean edo, areago, mikrouhinekoan, jatun bakoitzeko melokotoi bana erretzea, baxoerdi bana ardo zuri eta koilarakada erdi bana azukrerekin.

  • Fruituari gerrialdean egin ebaki bat inguru osoan, asko sartu gabe, leher ez dadin.

  • Erretakoan, utzi hozten, garastatu bere zukuaz eta lagundu esnegain harrotuarekin, adibidez.

28 MELOKOTOI TARTA MEKOTARRA (P. Añorga)

  • Lehenik, jogurta egingo dugu: sartu jogurt bat esnetan, irabiatu eta jarri flexopean, gau osoan. Flexotik zintzilik jertse bat ipini behar, ontzia inguratuz, leku itxia antolatuta.

  • Gero, melokotoi lata bat irekita, fruta xehe-xehe txikituko dugu. Esnearen tetra-bricka zabaldu, etzanda: bertan jarriko dugu geruza bat gaileta, denak elkarren ondoan, almibarretan blai, beste geruza bat jogurt, beste bat melokotoi txikitu, eta horrela segituko dugu. Gainetik, almibarrez blaitu eta horrela utziko dugu, dena gorputz bakarra osatu arte.

  • Horrelakoak ez ezik, marmeladaz, txokolatez, etc. ere egiten dituzte presoek.

30 NATILLAK

  • Irakin 1 l esne kanela-zotz batekin. Iragazi beste ontzi batera.

  • Nahasi koilarakada bat irin eta lau azukre; erantsi sei-zazpi gorringo.

  • Gehitu irakin duzun esnea, epel.

  • Jarri dena sutan eta eragin zurezko ziriarekin, etengabe.

  • Utzi irakinean bost bat minutuz, eraginez.

  • Hoztu buztinezko kazola zabalean.

  • Sei-zazpi zuringoak eta hiruzpalau koilarakada azukre hartuta, irabiatu elur-puntura eta hornitu natilen azalera.

31 PIKUA: LAU FORMULA

  1. Piku lehor edo melatuak ereinotz-hostoekin estali eta labean erretzen ziren Erdi Aroko (XIV. mendean) Provenzan.

  1. Datil, piku eta mahaspasak esne eta arrautzetan blaitu eta labean sarturik, fruitu lehorren budin goxoa jaten zuten garai hartan Hegoaldeko Italian

  1. Ardo goxo eta ur (erdia eta erdia, adibidez) epeletan beratu eta ondoren egosi: haragi astunen (txerrikia edo ehiza, adibidez) laguntzaile polita ezagutuko dugu.

  1. Luis Luzien Bonaparteren iloba zen W. C. Bonapartek asmaturikoak, armagnaketan beraturiko gerezi edo aranen ahaide, ezin ahantzizkoak izango dituzu, hara: egosi piku melatuak uretan, sua eme-emeki jarrita; beratu whiskytan, pazientziaz. Dastatu eta ipini piku gehiago hurrengoan

32 PIPER OPILAK

Arrautza irabiatu, azukre eta galirin xehea nahasi behar dira, ore lodia egin arte. Eman nahi duzun itxura (txerritxoa, gurutzea, ilargia, e.a.) eta erre labean. Aspaldiko partez ez zaie piperbeltzik eransten.

 

 

33 SAGAR ERREAK

  • Ebaki sagarraren gerriko azala (azala bakarrik), erauzi zuztarra, bete hutsunea azukrez, jarri azpilean pittin bat ur, sartu mikrouhineko labean eta eduki sei minutuz.

  • Begiratu: bakarren bat lehertzear baldin badago, atera bertatik eta segi egosten gainontzekoak.

34 SAGAR BISKUITA INTXAURSALTSAREKIN

Biskuita

Osagaiak: 250 g. azukre edo 200 g. ezti, 100 g. ur, 8 gorringo, 1 kg. errezil (edo errege-) sagar, zotz bat kanela, 400 g. nata.

Tresneria: eltzea, padera, bola, moldea, turmixa edo tenedorea, jeladora.

Sagarrak zuritu, zuztarra kendu eta puskatan egosiko ditugu, uretan kanela zotza erantsita.

Padera sutan jarriko duzu, su ttiki-ttikian, ur eta azukrearekin. Almibarra egin behar dugu hemen. Erne ibili, beraz. Halaz ere, esnegaina (hotza, hobe) harrotu egin dezakezu bitartean.

Bolean arrautzaren gorringoak irabiatu dituzu eta, gainetik, almibarra erantsiko diozu. Segi irabiatzen, nahaski hau epeldu arte. Sagarrak xukatu egin ditugu: erantsi sagarki hori bolera eta landu, ia-ia pure bihurtu arte. Azkenik, erantsi nata harrotua gehiegi astindu gabe, jaits ez dadin. Sartu moldean eta eduki jeladoran lau bat orduz.

35 SAGAR TARTA

  • Nahasi 6 koilarakada irin, 75 g gurin samurtu, 6 koilarakada azukre, 1 arrautza oso eta 1 gorringo, 1 kafe-koilaratxo legamia; eragin dena, ore malgua moldatzeko.

  • Berotu labea 180º C-tan.

  • Xehatu 6 errezil sagar (edo 4 sagar, bestelakoak) labanarekin, ezkata moduko pusketetan. Nahasi ongi orearekin.

  • Igurtzi molde desmuntagarria gurin edo olioz eta sartu bertan orea. Ebaki sagar bat edo bi xerra finetan, moldearen azala estaltzeko. Igurtzi xerrok abrikot-marmeladaz edo azukrez.

  • Sartu labean, honez gero bero dagoela, eta utzi bertan 40-45 minutuz.

  • Epeldutakoan, atera moldetik.

  • Molde desmuntagarria ez baduzu, ez jarri lehenago sagar-xerrak azalean. Erregosi paderan xerra horiek marmelada arinduan (siropez) eta tarta labetik ateratakoan apainduko duzu gainaldea.

36 SAN BLAS OPILAK

“Lau arrautze izaki, lau katilu zukre eta bi katilu olio. Nahasi dena entsaladeran eskuekin, ongi-ongi, eta erantsi irine, eskuekin ibiliz. Erantsi kikera bat anis eta kutxarille txiki bat bikarbonato. Zartagie ibeni suan olioz betea, ongi berotu arte, baina arrautze-oskola oliotan, erre ez dedin. Hartu eskuarekin masa pixke bat eta moldatu mahaien lukeinke bat; juntatu bi muturrek eta osatu arroskille antzeko bat. Olioa gori denean, frijitu sorta bat, lau edo sei. Gorritu direnean, atera fuentera eta bota zukrea gainetik. Hotzak jaten dira arroskille hauek.”

37 TORRADA EDO TORRIJAK

– Egosi 1,5 L esnetan kanela-zotza eta 150 g azukre ordu laurden batean, gatz pittin batez.

– Bitartean, xerratu bezperako ogi-barra eta zabaldu azpilean.

– Blaitu esnez eta utzi beratzen.

– Irabiatu 3 arrautza, berotu 4 dl olio eta hasi frijitzen xerrak: arrautzetatik iragan eta paderara. Buelta, buelta eta, poliki gorritutakoan, platerera.

– Zaindu olioa gehiegi bero ez dadin: hortxe duzu botoia, su-iturria erregulatzeko.

– Denak frijitutakoan, garastatu kanela-hauts eta 100 g azukrez.

38 ETXEKO TOSTADAK

  • Litro bat ardi-esne sutan jarriko dugu, limoi baten azal, 6 koilarakada azukrerekin. Eduki ordu laurden batez.
  • Moldeko ogia 3 cm-ko xerratan ebaki (4 xerra) eta utzi azpilean. Blaitu egositako esne horrekin eta utzi beratzen.
  • Frijitu xerrak olio bero-berotan eta utzi platerean.
  • Padera txikian 4 koilarakada azukre eta pattarren bat, gustukoa baduzu, karamelizatu dugu: horrekin estaliko ditugu xerrak.

 

 

39 MW TXOKOLATE-APARRA (Patxi Abad)

 

  • Irabiatu lau arrautza-zuringo elur puntura harrotzeraino. Gorde.
  • Ebaki pusketan txokolate on-ona (“bestela ez du merezi”) eta, kristalezko bol batean, bi koilarakada ur eta beste bi gurinekin, sartu mikrouhineko labean hiru minutuz, dena urtu dadin.
  • Atera, erantsi azukrea (nahi bada, nahi den adina), kopakada bat koñak, lau gorringoak. Nahasi dena.
  • Hoztu denean, erantsi zuringo harrotuak eta landu, xuabe-xuabe.
  • Hozkailura berriro, tamainan egon arte.

 

 

40 UDAREAK ARDOTAN

 

  • Zuritu (txortena erauzi gabe) laguneko udare bana edo bina, urte-sasoi eta aleen tamainaren arabera.
  • Jarri eltzean laguneko baso bana ardo beltz, launa ale piperbeltz, 50 g azukre eta zotz bat kanela.
  • Egosi emeki-emeki, fruituak ederki guritu arte.
  • Atera udareak, urritu sutan salda eta estali horrekin aleak.
  • Hotz edo bero zerbitza daiteke.

 

41 UDAREAK LARANJA-KREMAZ (J. Urrutikoetxea)

 

  • Litro erdi uretan urtu 350 g azukre, erantsi 4 piperbeltz-ale eta egosi bertan, su eztian, 4 udareak (gogortxoak, ahal izanik).
  • Hoztutakoan, ebaki xerratan, luzeran, eta utzi hozten, mahairako azpilean bertan.
  • Erauzi bi laranjari zukua eta gorde azalaren gorria (hau da, kanpo-kanpokoa, zuririk gabe), birrindurik.
  • Irabiatu 2 arrautza eta laranja-ura, gehitu azal birrindua eta eragin paderan, su motelean, loditu arte.
  • Sutatik atera, erantsi 80 g gurin, eragin.
  • Osatu platera eta zaindu aurkezteko era, kanela-hautsez.

 

42 ZOPAKANAK

Zopa gozo hau bai afariaren hasieran (Almandozen), bai janariaren postrean (Arizkunen) jan izan dut nik: batetik besterako aldea, batez ere, azukre-kopuruan zetzan. Ez dagoenetik atera beharrean oinarritzen da jaki hau, ikusiko dugunez. Bero edo epel jan beharko, koipe edo gantz gehiegi baitu hotz dastatzeko.

Kapoi edo beste hegazti baten gantzetan frijitu behar dira ogi-zopa meheak. Bitartean, kanela-zotz batekin ipiniko dugu esnea sutan. Biak egindakoan, nahasi. Irakin eta utzi epeltzen, lurrezko kazolan. Azkenean, kanela-hautsez “garaztatu” eta gorde epelean, jan arte.

43 ZOZOMIKOTEETAKO LARANJAK

 

Dauden azkenetakoak erabiliko ditugu: ipini 6 laranja xerra biribiletan ebakiak erretilu zabalean, koilarakada pare bat ronetan bera daitezen. Nahasi bol batean jogurt bat, 1 dl esnegain likido eta 150 g azukre. Harrotu bi arrautza zuringo eta erantsi nahasketari, asko eragin gabe. Napatu krema honekin laranja, hoztu eta zerbitzatu adiskideei.

45 KIKARAKO TXOKOLATEA (Andoni de Luis)

4-6 kikara prestatu nahi baduzu, irakin 1 l. esne, atera sutatik eta erantsi 350 g. txokolate beltz (%70 kakao daukanetik) eta 75 g. azukre. Irabiatu malatsa elektrikoarekin eta zerbitzatu.

46 ARROZESNEA (Andoni de Luis)

  • Zuritu 75 g. arroz ur irakinetan eta iragazi ur freskotan

  • Bitartean, berotu1 l. esne kanela-zotz batekin; irakiten hastean, erantsi 125 g. azukre eta arroza

  • Egosi 20 minutuz, su eztian, zurezko ziriarekin eragiteari utzi gabe

  • Atera sutatik, utzi epeltzen 5 minutuz eta erantsi 6 gorringo, adorez.

  • Gehitu 50 g. gurin pittinka-pittinka, dena bat bihurtu arte.

  • Hurrengoan aldatu (denbora gehiago, arroza galdarraztatu gabe, azukrearen ordez karamelua, gurinaren partez esnegaina jarriz…) zeure zaletasunen arabera.

Leave a Reply

Required fields are marked *


Tresna-barrara saltatu